Т.Мей “Brexit”-ийг хойшлуулахыг ЕХ-ноос хүсэхээр төлөвлөжээ

Их Британийн Ерөнхий сайд Тереза Мей “Brexit”-ийг хойшлуулах хүсэлтийг Европын Холбооноос /ЕХ/ албан ёсоор хүсэхээр төлөвлөж байна.

 

 

Телевизийн “BBC” сувагт яамны эх сурвалжийн мэдээлснээр, хойшлуулах хугацаа дээд тал нь хоёр жил байж магадгүй ажээ.

 

ЕХ-г төлөөлөн “Brexit”-ийн асуудлаар хэлэлцэгч Мишель Барньегийн хэлснээр, Их Британиас “тодорхой төлөвлөгөө” авахаас нааш ЕХ хойшлуулах хүсэлтийг хүлээн авахгүй ажээ.

 

Одоогийн хууль дүрмийн дагуу Их Британи гэрээ байгуулсан эсэхээс үл хамааран 9 хоногийн дараа ЕХ-ноос гарах юм.

 

Т.Мейн ЕХ-той хэлэлцсэн гэрээг Их Британийн парламентын гишүүд өнгөрсөн долоо хоногт батлаагүй билээ. Тэд мөн ЕХ-ноос гэрээгүйгээр гарах болон “Brexit”-ийн үйл явцыг сунгахыг дэмжиж буйгаа илэрхийлсэн юм.

 

Цаашид юу болох вэ?

  • Их Британийн Ерөнхий сайд “Brexit”-ийг хойшлуулах хүсэлтийг ЕХ-нд гаргана
  • Т.Мей дээрх асуудлыг хэлэлцэх зорилгоор ЕХ-ны дээд хэмжээний уулзалтад оролцохоор Брюссель хотыг пүрэв гарагт зорино
  • ЕХ-ны 27 гишүүн орон “Brexit”-ийг хойшлуулах хүсэлтийг зөвшөөрөх эсэх санал хураалт явуулна
  • ЕХ-ны гишүүд “Brexit”-ийг хойшлуулахыг зөвшөөрсөн тохиолдолд Т.Мей парламентын өмнө нь батлаагүй гэрээг батлуулахыг оролдож магадгүй
  • Парламентын гишүүд “Brexit”-ийг хойшлуулах асуудлаар санал хураалт явуулна
  • Гэрээг батлахын эсрэг санал өгсөн төлөөлөгчидтэй яриа хэлэлцээг үргэлжлүүлнэ
  • Засгийн газар ЕХ-ноос гарах тухай гурав дахь санал хураалтыг ирэх долоо хоногт явуулж магадгүй
  • Гэсэн хэдий ч асуулт адилхан хэвээр байх аваас парламентын гишүүдийн дунд санал хураалт явуулахыг зөвшөөрөхгүй гэж парламентын дарга мэдэгдээд байгаа юм
  • “Brexit”-ийг хойшлуулахыг зөвшөөрөөгүй тохиолдолд Их Британи гэрээ баталсан эсэхээс үл хамааран гуравдугаар сарын 29-нд ЕХ-ноос гарна