500 хий үзэгдэлд 310 саяын цалин өгч төсөв тонож байхад Н.Энхболд сайд хаана байсан бэ?

Саарал жагсаалтанд төсвөө сахилга баттай болго гэж оруулсан юм шүү дээ дарга нараа

Сангийн сайд Ч.Хүрэлбаатар УИХ-ын чуулганы нэгдсэн хуралдааны үеэр төсвийн мөнгө хувьдаа завшсан нэгэн ноцтой баримт дэлгэв. Тэрбээр хэлэхдээ "Зэвсэгт хүчний жанжин штабын нягтлан бодогч 500 хүн зохиомлоор үүсгэн цалин бодож, хувьдаа мөнгө завшсан" хэмээн хэлсэн юм. Монгол Улс "Саарал жагсаалт"-д орсон таагүй үйл явдал бол төсвийн сахилга батгүй байгаагаас болсныг сайдын мэдэгдэл давхар нотлов. Зэвсэгт хүчний салбарт ажиллаж байгаа захын нягтлан бодогч 500 хий үзэгдэлд цалин хэмээн 310 сая төгрөг бодож, тэрхүү мөнгөө хувьдаа завшсан нь энэ юм.

Нягтлан болдогч Б нь Зэвсэгт хүчний жанжин штабт ажиллаж байгаагүй бөгөөд 2014 оны 10 дугаар сарын 22-ноос 2017 оны 02 дугаар сарын 09-нийг хүртэл зэвсэгт хүчний 065, 150 дугаар ангиудын санхүүгийн нягтлан бодогчоор ажиллаж байсан юм билээ. Гадаад руу ажиллагаанд явсан, тэтгэвэрт гарсан хүмүүсийн нэр дээр цалин бичиж хохирол учруулсан. Ч.Хүрэлбаатар сайд үүн дээр бага зэрэг алдаж хэлсэн. Энэ луйврын хэргийг АТГ-аас шалгаж шүүхэд шилжүүлснээр 4 жил хорих ялаар шийтгүүлсэн юм билээ. Хачирхалтай нь улсын төсвөөс 310,725,167 төгрөг завшсан Б-гийн ялыг 2 жилээр хойшлуулсан байдаг.

Зэвсэгт хүчний салбарт цэрэг дайчид олноор амь насаа алдаж, луйварчид улсын төсвөөс олон саяар нь хулгайлж байхад Батлан хамгаалахын сайд Н.Энхболд сандалдаа шигдсээр суугаа нь гайхалтай. Батлан хамгаалах салбарын сайд хэрнээ Гадаад харилцааны сайд шиг тувт гадаад улс орнуудаар тэнээд явдаг гэх шүүмжлэлийг ч салбарынхан нь хэлэх болсон. Хөдөлмөрийн аюулгүй байдлын наад захын дүрэм журам мөрддөггүй хэрнээ цэрэг дайчдаар ажил хийлгэснээс болж залуус амь насаа алдсан өчнөөн олон жишээ баримт бий. Энэ салбарт сахилга баи, хариуцлагыг хамгийн дээд шат, сайдаас нь эхлэх ёстой болсныг энэ мэт гунигт жишээнүүд нотолсоор байгаа юм.

                                                                                                                                                                                                           ЭХ СУРВАЛЖ:  NIISLEL TIMES.mn