Нийслэлийн засаг дарга цэцэрлэг, сургуулийн барилга угсралтын ажлын явцтай танилцлаа

НИЙСЛЭЛИЙН ЗАСАГ ДАРГА ЦЭЦЭРЛЭГ, СУРГУУЛИЙН БАРИЛГА УГСРАЛТЫН АЖЛЫН ЯВЦТАЙ ТАНИЛЦЛАА

Нийслэлийн Засаг дарга бөгөөд Улаанбаатар хотын Захирагч С.Батболд Чингэлтэй дүүргийн 16 дугаар хороо буюу Хайлаастын эцэст байрлах цэцэрлэг, бага сургуулийн цогцолбор барилга, Баянзүрх дүүргийн 13 дугаар хороонд байрлах 14 дүгээр сургуулийн барилга, Сүхбаатар дүүргийн 4 дүгээр хороонд байрлах нэгдүгээр цэцэрлэгийн өргөтгөлийн барилга, Баянгол дүүргийн 18 дугаар хороонд байрлах 11 дүгээр цэцэрлэгийн барилгын ажлын явцтай танилцлаа.

Чингэлтэй дүүргийн 16 дугаар хороонд байрлах 204 дүгээр цэцэрлэг , 139 дүгээр сургуулийн цогцолбор барилгыг “Нью констракшн” ХХК нийслэлийн төсвийн хөрөнгөөр барьсан бөгөөд ажлын явц 90 хувьтай байна. Тус цогцолборын цэцэрлэг нь 120, сургууль нь 160 хүүхэд хүлээн авах хүчин чадалтай. Одоогийн байдлаар сантехникийн ажлын тендерт маргаан гарч, хоёр  удаа цуцлагдсан учраас барилгын ажил удааширч байгаа гэдгийг гүйцэтгэгч компанийнхан хэллээ. Үндсэн барилгын ажил, барилгын хаяавч, үүдний шат, спорт заалны шалнаас бусад ажил бүрэн дууссан бөгөөд гадна тохижилтын ажил түр хүлээгдэж байгаа юм.

Энэ үеэр нийслэлийн Засаг дарга бөгөөд Улаанбаатар хотын Захирагч С.Батболд тендерийн маргаантай асуудлыг яаралтай шийдэж, уг цогцолборын барилгыг 09 сарын 10-ны дотор бүрэн ашиглалтад оруулахыг үүрэг болгов. Мөн тэрээр “Засаг даргын орлогч нараар ахлуулсан ажлын хэсэг Улаанбаатар хотод шинээр барьж, өргөтгөл хийж байгаа сургууль, цэцэрлэгүүдээр явж дүгнэлт гаргаж байгаа юм. Энэ онд 30 гаруй сургуулийг багтаан ашиглалтад оруулж, сургуулийн хүчин чадал 3040 суудлаар нэмэгдэнэ.Түүнчлэн 9 сарын 1-нээс 9 сарын 10-ны хооронд хүүхдүүдээ хүлээн авах 7 бага сургууль, цэцэрлэгийн цогцолбор бэлэн болсон. Гэсэн хэдий ч шилжилт хөдөлгөөнийг зохицуулахгүйгээр хүртээмжийг бүрэн хангана гэдэг боломжгүй. Цэцэрлэгт шинээр бий болж байгаа суудлын тооны 20 хувийг зорилтот бүлэгт, 80 хувьд нь тусгай талон тарааж, сугалаа явуулахаас өөр аргагүй болоод байгаа юм. Мөн энэ үеэр авлига өгч, авдаг гэсэн гомдол их гардаг учраас Авлигатай тэмцэх газартай хамтран хяналт тавьж ажиллана” гэлээ.  


Үүний дараагаар Баянзүрх дүүргийн 13 дугаар хороонд байрлах 14 дүгээр сургуулийн барилгын ажлын явцтай танилцав. Тус сургууль нь 1500 хүүхдийн суудалтай бөгөөд одоогийн байдлаар барилгын суурийн ажлыг гүйцэтгэж байгаа юм. Ажлын явц 7 хувьтай байна. Уг сургуулийн барилга угсралтын ажлыг концессоор “Цамхаг констракшн” ХХК гүйцэтгэж байна. Гэрээнд заасан хугацаагаар 2017 оны 08 дугаар сард  ашиглалтад оруулахаар төлөвлөжээ.

Нийслэлийн төсвийн хөрөнгөөр “Хаппи бьюлдинг” ХХК-ийн барьж байгаа Сүхбаатар дүүргийн 4 дүгээр хороонд байрлах 200 ортой нэгдүгээр цэцэрлэгийн өргөтгөлийн барилгын ажлын явц 75 хувьтай байна. Одоогийн байдлаар барилга угсралт, шавардлага, цонх суулгах ажил бүрэн дуусч, гадна, дотор шугам сүлжээний ажил хийж байгаа юм.

Баянгол дүүргийн 18 дугаар хороонд байрлах 11 дүгээр цэцэрлэгийн барилгын ажлын явц 89 хувьтай байна. Тус барилгыг нийслэлийн төсвийн хөрөнгө оруулалтаар “Урагшлах” ХХК барьж байна. 2015 оны 07 сарын 15-нд газар шороо, суурь цутгалын ажлыг эхлүүлжээ. 2015 оны 11 сар хүртэл цутгалын ажил бүрэн дуусч, хамар, хана, дээвэр, цонх, хаалга суулгаж, гадна заслын ажлыг хийж дууссан бөгөөд өвлийн улиралд технологийн шаардлагаар зогссон байна. Энэ оны 04 сард барилгын ажлыг үргэлжлүүлж дотор засал, сантехник, цахилгааны угсралт, фасадны ажлыг гүйцэтгэжээ. Өнөөдрийн байдлаар дотор засал, гадна тохижилтын ажлыг хийж байна гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

image/2016/08/19/biyvo0y4wtous326/p1aqh0qlva1g301g17l2ajhoo3p2
image/2016/08/19/lfjsos8qjuo0cpwt/p1aqh0qlva1m231qldc31bh5u0c5
image/2016/08/19/ju5sw7rhrvmj0e8y/p1aqh0qlva1ula1smt1lvp1bvm2f1a
image/2016/08/19/rlfmov7055jtcorw/p1aqh0qlva6rq6ot1h5n15ft129i6
image/2016/08/19/84y0lk38gxrotoe1/p1aqh0qlva16haj8pcirlvq19rr9
image/2016/08/19/kdq8re9hmtffsiso/p1aqh0qlva16q717rn19l2lga1h0h1
image/2016/08/19/qd0iil48m2bodgnz/p1aqh0qlva18u11upehc36krh3g7
image/2016/08/19/jdtsgc35i8fnstic/p1aqh0qlvaj6hlpe1l4q17m41u3l4
image/2016/08/19/z1ks9g8mdq41in6v/p1aqh0qlvajlc1k531lssj8s1jgp8
image/2016/08/19/45jld15l90gtk451/p1aqh0qlvb1pg21aeg1260am617pab
image/2016/08/19/lkhxsgmsayh9hr5t/p1aqh0qlvbu3cbc61tqh1cd410rkc